你身邊，或者你自己會唔會係呢類人？
🔎 向男人表達自己易相處：
「其他女人次次出街都化行妝、食嘢影相打卡又搞勁耐，我唔會好似佢哋咁麻煩姿整。」
🔎 向男人表達出獨立意識：
「其他女人都咁痴身，又成日要人陪好麻煩，我就自己一個冇問題。」
🔎 向男人強調自己嘅不拘小節：
「你女朋友成日呷醋咁小氣，如果我係佢，我就唔會嬲呢啲小事。」
有上述行為嘅女人最近俾人定義咗為「Pick Me Girl」！

到底咩係Pick Me Girl？
有啲女人經常顯露出「我同其他女人唔同」嘅態度，藉此展現出自己係「更適合俾男性選擇嘅另一半」。佢哋會自覺、或不自覺地將爭取男性認同當作目標，甚至希望藉此獲得「好女人」嘅認同，就此奪取嚟自男人嘅注意力同好感。

好多人一開始向男性示好時，好熱衷飾演一個「好女人」，喺男人面前表示出最好嘅一面，演繹出自己同其他女人唔同嘅一面，想俾個好印象對方。心入面嘅真正諗法、價值觀唔敢講出嚟，怕講咗出嚟男人會唔鍾意。只好口不對心地講出違心說話，以為咁樣對方就會受落。
例子包括：明明想對方請食飯，但又口講話唔使；明明想對方送你返屋企，但又口講話唔需要；明明好在意對方同其他女人出街，又口講話唔緊要。

其實就算有講嗰幾類說話都唔係問題，問題係在於：作為女仔，想透過咁樣講嚟踩低其他女仔，從而吸引男性好感。不過喺「戀愛如戰場」嘅世界，有競爭意識係好正常，但更大嘅問題在於當為咗想吸引異性好感而講出呢類說話後，有違自己真實心聲，後續影響先係最大嘅問題！

男人有時係單向思維嘅動物，你講乜、佢信乜。当你話唔使請食飯，当你話唔介意同佢異性出街，佢就會信以為真，唔會深究你咁講嘅用意。但當你一開始拼命壓低自己嘅需要，努力抑制自己內心真實想法，到佢真係照你講嘅嘢咁做，你心入面其實又唔滿意，亦會諗點解對方唔上心，點對方係咪對你唔夠好。

同同性競爭嘅心態係正常，取悅異性嘅心態都係正常，但唔需要成為一個Pick Me Girl。希望表達出自身是個更值得男人喜歡嘅對象，你，就係你！只有向男人展示出你最Real嗰一面，而佢又真正願意接受，咁往後大家嘅相處先係真正融洽，出現嘅爭執亦會少好多，咁樣嘅感情先可以行得更遠。

感情拯救所話你知，真正想獲得男人嘅關注，其實係唔需要透過貶低別女性，唔需要一味地壓低自己嘅需要，亦唔需要向男人講出違心嘅說話。要相信自己真係好值得被愛，要相信就算做真正嘅自己，都會獲得被愛嘅機會！如果你都有類似感情煩惱，不如搵我哋傾吓啦。